Türkmenistanyň Täze Zelandiýadaky ilçisi (oturýan ýeri Tokio şäheri) Atadurdy Baýramow Täze Zelandiýanyň her ýylyň 6-njy fewralynda bellenilýän milli baýramy — Waýtangi güni mynasybetli geçirilen resmi çärelere gatnaşdy.
Iş saparynyň çäklerinde ilçi ýurduň ýokary wezipeli döwlet resmi wekilleri bilen duşuşyklary geçirdi. Gepleşikleriň esasy mazmuny türkmen-täze zeland gatnaşyklaryny mundan beýläk-de berkitmekden ybarat boldy diýip, Türkmenistanyň Daşary işler ministrligi habar berdi.
Täze Zelandiýanyň General-gubernatory Sindi Kira bilen geçirilen duşuşykda diplomat Türkmenistanyň Prezidenti Serdar Berdimuhamedowyň we Halk Maslahatynyň Başlygy Gurbanguly Berdimuhamedowyň adyndan milli baýram mynasybetli gutlaglary ýetirdi. Şeýle hem oňa özüne amatly wagtda Türkmenistana sapar bilen gelmek baradaky çakylyk gowşuryldy.
Saparyň dowamynda ilçi A. Baýramow daşary işler ministri Winston Piters, söwda we maýa goýum ministri H. Todd Makkleý, şeýle hem Täze Zelandiýanyň parlamentiniň wekilleri bilen gepleşikleri geçirdi. Taraplar syýasy-diplomatik, söwda-ykdysady hyzmatdaşlygy we medeni-ynsanperwer gatnaşyklary ösdürmegiň mümkinçiliklerini ara alyp maslahatlaşdy.
Duşuşyklaryň jemleri boýunça taraplar iki ýurduň daşary syýasat edaralarynyň arasynda ilkinji syýasy geňeşmeleri geçirmek mümkinçiliklerini öwrenmäge, parlamentara hyzmatdaşlygy ösdürmäge, ykdysady gatnaşyklar boýunça hökümetara toparlary döretmäge we özara saparlary guramaga taýýardyklaryny nygtady.
Türkmenistanyň ilçisi Täze Zelandiýanyň Waýtangi gününe bagyşlanan çärelere gatnaşdy
- şu gün 13:14
- 443
