Türkmen modelýeri Göwher Güwerne-Pirkulyýewa Er-Riýadda fransuz kutýurýesi bilen bilelikdäki toplumyny görkezdi

Türkmen dizaýneri Göwher Güwerne-Pirkulyýewa, Saud Arabystanynyň Er-Riýad şäherinde 4-nji we 8-nji fewral aralygynda geçirilýän «Oriental Fashion Show» çäresiniň çäklerinde fransuz kutýurýesi Klod Patrik bilen bilelikde taýýarlan lybas toplumyny görkezdi. Bu barada çäräniň sosial ulgamlarynda habar berilýär.
Bu hyzmatdaşlyk türkmen milli geýminiň däpleri bilen Ýewropa modasynyň döwrebap çemeleşmelerini bir ýere jemledi. Görkeziş dürli ýurtlaryň we medeniýetleriň dizaýnerleriniň arasynda gepleşikleri ösdürmäge gönükdirilen «Oriental Fashion Show» halkara maksatnamasynyň bir bölegi boldy.
DigitalNews Fashion neşiri bu toplumy «tomaşaçylary haýran galdyryp bilen, güýçli medeni utgaşmadan dörän aňrybaş fransuz-türkmen hyzmatdaşlygy» diýip atlandyrdy.

Göwher Güwerne-Pirkulyýewa milli ähenleri döwrebap estetika bilen utgaşdyrýan lybaslary bilen meşhurdyr. Dizaýner Parižde we Sankt-Peterburgda hünär tejribesini alyp, ençeme halkara taslamalara gatnaşdy.
Fransuz dizaýneri Klod Patrik bu hyzmatdaşlygyň çäklerinde sypaýy görnüşlere we häzirkizaman şekillere aýratyn üns berdi. Hut şunuň özi-de toplumyň özboluşly hem sazlaşykly görünmegine uly täsir etdi.
«Oriental Fashion Show» — 2004-nji ýylda esaslandyrylan halkara moda taslamasydyr. Ol hereket edýän döwrüniň içinde 50 ýurtdan 100-den gowrak dizaýneri dünýä tanymal etdi  we moda äleminde medeniýetara gatnaşyklaryň ösdürilmegine öz mynasyp goşandyny goşdy.