Biedep syýahatçylar sebäpli ýapon şäherinde sakura güllese-de festiwal geçirilmez

Ýaponiýanyň Fudzi dagynyň golaýynda ýerleşýän Fudziýosida şäheriniň häkimiýetleri, syýahatçylaryň sanynyň çendenaşa artmagy we olaryň tertipsiz hereketleri sebäpli, sakuranyň güllemegi mynasybetli şu ýylky geçirilmeli festiwaly ýatyrmak barada karara geldiler. Bu barada mignews.com neşiri habar berýär.
Şäher häkimliginiň maglumatyna görä, turistleriň köpçülikleýin akymy, ýollarda emele gelýän dowamly dyknyşyklar köçeleriň çendenaşa hapalanmagyna sebäp boldy. Ýerli ýaşaýjylar käbir syýahatçylaryň hususy eýeçilikdäki ýerlere, şol sanda howlulara-da birugsat girýändiklerinden, hatda ol ýerleri öz zerur hajatlary üçin hem ulanýandyklaryndan şikaýat edýärler.
Bahar paslynda gülleýän alça agaçlary we Fudzi dagynyň ajaýyp görnüşi üçin Fudziýosida şäheri örän köp syýahatçyny özüne çekýär. Emma şäher häkiminiň belleýşi ýaly, sebitiň barha artýan meşhurlygy «şäherlileriň parahat durmuşyna» wehim salyp başlady.
«Biz güýçli ruhyçökgünlige uçradyk» diýen şäher häkimi festiwaly ýatyrmak baradaky kararynyň ýerli ilatyň bähbitlerini goramak we jemgyýetçilik tertibini saklamak üçin derkarlygy bilen düşündirýär.