Ýura döwrüniň ýyrtyjy dinozawrlary öz kowumdaşlarynyň çagalary bilen iýmitlenipdir diýlip çaklanylýar

Ýura döwrüniň ahyrlaryndaky ekoulgamda ýyrtyjy dinozawrlaryň esasy awy uly göwreli äpet jandarlar däl-de, eýsem zawropodlaryň çagalary bolupdyr. Londonyň uniwersitet kollejiniň alymlarynyň geçiren täze barlaglary şeýle netijä gelmäge esas döretdi.
Zawropodlar — uly ýaşynda äpet ölçeglere ýetýän, uzyn boýunly iri ot iýiji dinozawrlardyr. Emma doglanlarynda örän kiçi ýumurtgadan çykýandyklary sebäpli, olaryň çagalary uzak wagtlap ejizje hem-de goragsyz bolupdyr. Alymlaryň bellemegine görä,  şeýle uly göwreli haýwanlar üçin ýumurtgalaryna ideg etmek kyn bolan bolmaly. Üstesine alnan maglumatlar hem, edil häzirki zaman deňiz pyşbagalarynda bolşy ýaly, olarda ata-enelik aladasynyň bolmandygyny görkezýär.
Barlagçylar dinozawrlaryň beden ölçeglerine, dişleriniň we süňkleriniň izotop düzümine we gatap daşa dönen aşgazanyndan tapylan seýrek tapyndylara esaslanyp, giçki ýura döwrüniň iýmit zynjyryny dikeltdiler. Seljerme üçin häzirki zaman ekoulgamlary öwrenilende ulanylýan nusgalar peýdalanyldy.
ABŞ-daky Morrison formasiýasy we Koloradodaky «Dry Mesa Dinosaur Quarry» tapyndylar künjegi maglumatlaryň esasy çeşmesi boldy. Seljerme ýaş zawropodlaryň dürli ýyrtyjylar üçin yzygiderli aw bolandygyny we edil şonuň ýaly, Allosaurus ýaly ýyrtyjylaryň iýmitiniň  hem esasy bölegini düzendigini görkezdi.
Alymlaryň pikiriçe, aňsat tapylýan awuň köp bolmagy ýura döwrüniň ýyrtyjylaryna çylşyrymly awçylyk ukyplary bolmazdan hem oňňut etmäge mümkinçilik beripdir. Zawropodlaryň sany azalandan soň, ewolýusiýa gysyşy güýçlenipdir. Bu bolsa has giçki döwürleriň ýyrtyjylarynda dişleýiş ukybynyň güýçlenmegine, görüş ukybynyň ösmegine we howply awlary awlamaga bolan ukyplaryň ýüze çykmagyna getiripdir.