Hytaýly hünärmenler kosmos bilen Ýeriň arasynda lazer şöhlesi arkaly maglumat geçirmek boýunça nobatdaky synagy üstünlikli tamamladylar. Hytaýyň Ylymlar akademiýasynyň Aerokosmos maglumatlary instituty (AIR) maglumat geçirmegiň tizliginiň sekuntda 120 gigabite (Gbps) ýetendigini mälim etdi.
Bu görkeziji ýokary tizlikli kosmos aragatnaşygy pudagynda Hytaýyň täze milli rekordy hökmünde hasaba alyndy.
Synaglarda AIRSAT-02 emeli hemrasy we 500 millimetrlik aperturaly (linzanyň açylyşy) AIR ýerüsti stansiýasy ulanyldy.
Iň gyzykly tarapy, alymlar hemranyň enjamlaýyn bölegine degmezden, diňe programma üpjünçiligini täzeden sazlamak arkaly tizligi 60 Gbps-den 120 Gbps-e çenli iki esse artdyrmagy başardylar. Alnan maglumatlar ýokary durulykdaky (HD) kosmos şekilleriniň bökdençsiz we takyk işlenilmegini üpjün etdi.
Geçirilen synaglar lazer kanalynyň örän durnuklydygyny subut etdi. Birikme birnäçe sekundyň içinde 93% -den gowrak netijelilik bilen guruldy. Aňrybaş üznüksiz aragatnaşyk wagty 108 sekunt dowam etdi. Gysga wagtyň içinde jemi 12,656 terabit maglumat Ýere geçirildi.
