Xiaomi kompaniýasy özüniň HyperOS operasion ulgamyny düýpli täzeläp, onuň düzümindäki könelen Android kodlaryny hususy komponentleri bilen çalşyrmagy meýilleşdirýär. Bu barada belli tehnologiýa insaýderi «Digital Chat Station» habar berýär.
Xiaomi-niň täze nesil programma üpjünçiligi diňe bir interfeýs däl, eýsem ulgamyň düýp esaslaryny özgertmäge gönükdirilendir. Ulgama Xiaomi-niň şahsy emeli aň modeli ornaşdyrylar, bu bolsa smartfonyň ulanyjynyň endiklerine has çalt uýgunlaşmagyna kömek eder.
HyperOS häzirki wagtda ähli programmalar bilen doly işleşmek üçin Android hyzmatlaryny saklap galýar, ýöne wagtyň geçmegi bilen ulgam has özbaşdak bolar.
Taslama «Adam — Öý — Ulag» konsepsiýasyny birleşdirip, Xiaomi-niň ähli enjamlarynyň bir bitewi ulgamda işlemegini üpjün edýär.
Kompaniýanyň prezidenti Leý Szýun 2026-njy ýyla çenli doly tehnologik birleşmä ýetmegi maksat edinýär.
Xiaomi 2026-njy ýylda özüniň flagman smartfonlarynda ulanjak hususy mikroshemalaryny hödürlär diýlip garaşylýar. Bu maksatlara ýetmek üçin bäş ýylyň dowamynda 200 milliard ýuan (takmynan 28,6 milliard dollar) serişde gönükdiriler.
Maýa goýumlarynyň esasy bölegi ýarymgeçirijiler (çip önümçiligi), programma üpjünçiligi we emeli aň pudaklaryna sarp ediler.
