YouTube-yň Android we iOS üçin mobil goşundylarynda Shorts wideolaryny ulanyjy lentasyndan doly aýyrmaga mümkinçilik berýän täze funksiýa peýda boldy. Bu mümkinçilik taýmer ulgamynyň täzelenmegi netijesinde amala aşyryldy; indi gysga wideolara tomaşa etmek üçin sarp edilýän wagtyň çägini "nol" (0) edip bellemek bolýar.
Täze funksiýa geçen ýylyň oktýabr aýynda hödürlenen wagty dolandyrmak funksiýasynyň dowamydyr. Eger öňler wagty çäklendirmegiň iň pes derejesi 15 minut bolan bolsa, indi ulanyjylar "0" wagty saýlap bilýärler. Başda ene-ata gözegçiligi üçin niýetlenen bu giňeldilen gurallar ýanwar aýynda işe girizilipdi, indi bolsa YouTube-yň wekili nollyk taýmeri gurnamak mümkinçiliginiň ähli ulanyjylar, şol sanda adaty uly ýaşly akkauntlar üçin hem ornaşdyrylýandygyny tassyklady.
Bu funksiýa "çalt" kontent sarp edilişini azaltmak isleýänler üçin niýetlenendir. Bellenen wagt çägine ýetilen wagty, Shorts bölüminde degişli duýduryş peýda bolýar we wideolaryň görkezilişi togtadylýar. Synaglaryň netijesine görä, taýmer nola goýlanda, Shorts wideolary goşundynyň esasy sahypasyndan hem ýitýär.
Bu mümkinçiligi işe girizmek üçin YouTube goşundysynyň sazlamalaryndan (Settings) «Wagty dolandyrmak» (Time watched) bölümine geçmeli, lentada gysga wideolaryň görkezilişini çäklendirmegi işjeňleşdirmeli we saýlanýan wagt aralygyny bellemeli.
