Instagram-a we Facebook-a eýelik edýän Meta kompaniýasy diňe bir gezeklik görlüp, soň bolsa öçýän suratlar arkaly habarlaşmak üçin niýetlenen täze Instants goşundysyny tanyşdyrdy.
Hyzmatyň esasy ideýasy — inflýuenserleriň (täsir edijileriň) we mahabatyň täsiri bolmazdan, adaty mazmuny paýlaşmak usulyna dolanyp barmakdan ybaratdyr. Platforma ulanyjylara gündelik pursatlary hakyky wagt tertibinde paýlaşmaga mümkinçilik berýär.
Instants goşundysynyň aýratynlygy — diňe şol pursatda düşürilen suratlaryň kabul edilmegidir. Işläp düzüjiler suratlary galereýadan ýüklemek ýa-da redaktirlemek guralaryny ulanmak mümkinçiligini aýyrdylar; ulanyjylar öz "pursatlaryna" diňe tekst goşup bilýärler. Üns bilen saýlanan suratlaryň ýerleşdirilýän esasy Instagram ugrundan tapawutlylykda, täze hyzmat hakyky durmuşdaky çalt düşürilen suratlara üns berýär. Bu suratlar dostlar üçin 24 sagatlap elýeterli bolup, soňra yzyna gaýtarylmaz derejede öçüp gidýär.
Meta-nyň wekilleri häzirki wagtda jemgyýetiň isleglerini öwrenmek we erkin aragatnaşyk gurşawyny döretmek üçin Instants-yň dürli wersiýalaryny barlaýandyklaryny belleýärler. Häzirki wagtda bu hyzmat iki formatda: Instagram-yň içindäki aýratyn funksiýa we özbaşdak goşundy görnüşinde elýeterlidir.
Häzirki wagtda Instants goşundysyny Android we iOS ulgamlarynda çäkli sandaky ýurtlaryň, hususan-da Ispaniýanyň we Italiýanyň ýaşaýjylary ýükläp alyp bilerler. Synag tapgyry tamamlanandan soň, hyzmatyň elýeterli boljak ýurtlarynyň sanynyň artmagyna garaşylýar, emma global satuwa çykaryljak anyk wagty entek mälim edilmedi.
