Türkmenistanda «Oguz hanyň zehinli nesilleri» atly IV mekdep olimpiadasy geçiriler

Türkmenistanda mekdep okuwçylarynyň arasynda «Oguz hanyň zehinli nesilleri» atly IV integrirlenen olimpiada geçiriler. Çäräniň guramaçysy hökmünde Türkmenistanyň Oguz han adyndaky Inžener-tehnologiýalar uniwersiteti çykyş edýär.
Olimpiada gatnaşmaga ýurduň orta mekdepleriniň 9–12-nji synp okuwçylary çagyrylýar. Olimpiada matematika, fizika, himiýa, biologiýa derslerini we logiki pikirlenmäni öz içine alýar. Bir mekdepden okuwda ýokary netijeleri görkezen 20 okuwçy (her synpdan bäş okuwçy) gatnaşyp biler. Hasaba alyş işleri uniwersitetiň resmi saýtynda 25-nji fewrala çenli onlaýn görnüşde amala aşyrylýar.
Olimpiada üç tapgyrda: etrap, welaýat we döwlet tapgyrlarynda geçiriler. Ähli tapgyrlar türkmen we iňlis dillerinde alnyp barlar.
Birinji tapgyr 10–17-nji marta, ikinji tapgyr 8-nji aprele meýilleşdirilýär. Finala çykanlar iýun aýynda uniwersitetiň binasynda geçiriljek jemleýji tapgyra gatnaşmak üçin Aşgabada çagyrylar.
Ýeňijiler we baýrakly orunlary eýelänlere diplomlar, gymmat bahaly sowgatlar hem-de Türkmenistanyň we daşary ýurtlaryň ýokary okuw mekdeplerine girmek üçin teklip hatlary berler. Islendik tapgyrdan geçen okuwçylar uniwersitetiň «Altyn gaznasyna» giriziler, bu bolsa okuwa girmekde ýeňillikleri berýär.
Olimpiadanyň geçirilişi, düzgünnamasy we gatnaşmak üçin arzalary tabşyrmagyň tertibi baradaky doly maglumatlar uniwersitetiň saýtynda ýerleşdirilendir.