Bosch kompaniýasy ýyllyk girdejisiniň iki esse peselmegi sebäpli Germaniýada 20 müň işgärini boşadar. Bu barada Politico gazeti kompaniýanyň beýanatyna salgylanyp habar berýär.
Şeýle karara ýurtdaky soňky 12 ýylyň dowamynda iň ýokary derejä ýeten işsizligiň esasynda gelinendigi aýdylýar. 2026-njy ýylyň ýanwar aýynda işsizleriň sany 3 milliondan gowrak raýaty öz içine aldy.
Kompaniýa iş ştatlaryny tertipleşdirmek baradaky meýilnamalaryny tassyklady. Bosch-uň baş direktory Stefan Hartung 2025-nji ýyly kärhana üçin çylşyrymly döwür bolandygyny aýdyp, ýagdaýy: «Ykdysady hakykat biziň netijelerimizde hem görnüp dur» diýip, bir jümlede gönümel suratlandyrdy.
Mundan ozal, geçen ýylyň aprel aýynda Bosch-uň ýolbaşçy düzümi 2026-njy ýylyň ahyryna çenli iki sany zawody ýapjakdygyny yglan edipdi. Gürrüň Saksoniýadaky (Zebnis şäheri) we Baden-Wýurtemberg federal ştatyndaky (Laýnfelden-Ehterdingen) kärhanalar barada barýar.
Munuň bilen bir wagtda, pudagyň beýleki wekilleri hem maliýe kynçylyklaryny başdan geçirýärler. Hususan-da, Financial Times gazeti dekabr aýynda Volkswagen konserniniň 88 ýylyň dowamynda ilkinji gezek Germaniýanyň çägindäki zawodlarynyň birini ýapmak niýetiniň bardygyny habar beripdi.
Bosch maliýe kynçylyklary zerarly 20 müň işgärini işden boşatmagy meýilleşdirýär
- şu gün 09:43
- 416
