«Garri Potteriň» gahrymany Hytaý täze ýylynyň garaşylmadyk nyşanyna öwrüldi

Hytaý täze ýylynyň bu ýylky dabarasynda garaşylmadyk gahryman peýda boldy. Gündogar kalendary boýunça 2026-njy ýylyň resmi nyşany bolan Otly gyzyl At (Ýylky) bilen bir hatarda, baýramçylygyň ýene bir resmi däl nyşany — Drako Malfoý peýda boldy.
Hemme zat däp bolan täze ýyl bezeglerinden başlandy. Adatça, 2026-njy ýylda 17-nji fewralda belleniljek Bahar (Çunsze) baýramyna taýýarlyk görlende, hytaýlylar gapylaryna ak pata berýän gyzyl zolaklary we «bagt» manysyny berýän 福 (fú) iýeroglifi ýazylan romblary asýarlar. Emma bu gezek ýaşlar baýramçylyga, sözüň doly manysynda, jady gatmak kararyna geldiler. Netijede gapylarda, ofislerde we dükanlarda «Garri Potterde» Tom Feltonyň janlandyran gahrymanynyň suratlary we otkrytkalary peýda bolup başlady. Munuň sebäbi iýeroglifleriň we sözleriň manysyndadyr. Çünki  Malfoýyň familiýasy hytaý dilinde 马尔福 (Mǎ'ěr fú) diýlip ýazylýar we 马 iýeroglifi «at», 福 bolsa «bagt» diýmegi aňladýar. At ýylynda şeýle sazlaşyk ünsden düşürer ýaly däldi.
Şunlukda, Drako Malfoý özboluşly täze ýyl arzuwyna — «bagt getirýän ata» öwrüldi we onuň geň-enaýy bezelen şekilleri  dessine sosial torlaryna,  şonça tizlikde X, Threads we Instagram platformalaryna ýaýradyldy.
Suratlaryň käbiri däbe eýerilip, başaşak asyldy. Beýle etmek, hytaý medeniýetinde bagtyň eýýäm «gelendigini» aňladýar.