Apple kompaniýasy özüniň ilkinji eplenýän smartfony bolan iPhone Fold-y 2026-njy ýylyň sentýabrynda hödürlemegi meýilleşdirýär. Şol bir wagtda kompaniýa çeýe enjamlaryň hataryny giňeltmegi, şol sanda kese şarnirli has ykjam «flip» modeliniň üstünde işlemegi hem göz öňünde tutýar.
Şeýle eplenýän smartfonyň işlenip düzülýändigi barada «The Information» neşiri 2024-nji ýylda habar beripdi. Şonda Kupertinoda kese eplenme mehanizmi bolan azyndan iki sany prototipiň synagdan geçirilendigi, şeýle-de ahyrynda iPhone Fold adyny alan has uly göwrümli, kitap görnüşli enjamyň üstünde işlenilendigi bellenilipdi. Dizaýnerleriň esasy wezipesi häzirki iPhone-lardan has inçe we eplenen ýagdaýynda gabaraly görünmejek smartfony döretmekden ybaratdy. Şeýle hem, enjamyň daşky tarapyny habarnamalar bilen işlemek üçin goşmaça ekran bilen üpjün etmek mümkinçiligi ara alnyp maslahatlaşyldy.
Akkumulýatorlar we displeýler bilen baglanyşykly çäklendirmeler sebäpli Apple netijede iPhone 18 Pro we Pro Max modelleri bilen bilelikde çykjak iPhone Fold taslamasyna ünsi gönükdirdi.
Emma Bloomberg-iň synçysy Mark Gurmanyň ýazmagyna görä, kompaniýa ýene-de flip-enjamy baradaky pikire gaýdyp geldi. Apple häzirki wagtda Motorola Razr ýa-da Samsung Galaxy Z Flip modellerine meňzeş inedördül görnüşli eplenýän smartfony öwrenýär. CNET neşiriniň maglumatyna görä, täze smartfon 2028-nji ýylda peýda bolup biler.
Täze enjamyň esasy artykmaçlygy onuň ykjamlygy, dizaýny hem-de habarnamalary we emeli aň funksiýalaryny görkezmek üçin daşky ekranyň ulanylmagy bolar.
Ilkinji iPhone Fold-yň 7,8 dýuým diagonally içki çeýe ekrana we 5,5 dýuýmlyk daşky displeýe eýe bolmagyna garaşylýar. Onuň korpusy aýnadan we titandan ýasalyp, dört kamera we 5500 mA·sag sygymly goşa batareýa bilen üpjün ediler. Deslapky maglumatlara görä, onuň başlangyç bahasy, takmynan, 2 müň dollar bolar.
Apple kompaniýasy iPhone Fold-dan soň ykjam «flip» eplenýän smartfonyny taýýarlaýar
- 03.02.2026 18:37
- 2.2k+
