Apple kompaniýasy özüniň ilkinji giňeldilen hakykat (AR) äýnekleriniň çykarylmaly möhletini üýtgetdi. Kompaniýa ozal bu enjamy 2026-njy ýylda görkezmegi meýilleşdiripdi, ýöne häzirki wagtda onuň bazara çykarylmagynyň 2027-nji ýylyň ahyryndan ir bolmagyna garaşylmaýar diýip, «Bloomberg» neşiriniň žurnalisti Mark Gurman habar berýär.
Çeşmäniň berýän maglumatyna görä, Apple bu enjamy N50 kod ady bilen işläp taýýarlaýar, ýöne gajetiň esasy funksiýalary Siri ses kömekçisiniň täze görnüşine gönüden-göni baglydyr. Bu ses kömekçisiniň ösdürilmegi we kämilleşdirilmegi bolsa häzirki wagtda gijikdirmeler bilen ýüzbe-yüz bolýar.
Siri ulgamynyň akylly görnüşiniň AR-äýnekleri ulanmakda esasy sütün bolmagyna garaşylýardy. Ulgam ulanyjynyň göz öňündäki obýektleri tanamaly, kontekstual maglumatlary bermeli we giňeldilen hakykat bilen baglanyşykly beýleki funksiýalary ýerine ýetirmelidi.
Mark Gurmanyň maglumatyna görä, edil şu mümkinçilikleriň doly kämilleşdirilmändigi enjamyň ozal bellenen möhletlerde bazara çykarylmagyna esasy bökdençlik boldy.
Žurnalistiň baha bermegine görä, Apple eýýäm şeýle enjamlary öndürýän iri kompaniýalaryň işleýän bazaryna girmeli bolar. Ýakyn wagtda Google we Samsung kompaniýalarynyň täze önümleriniň peýda bolmagy bilen bu ugurdaky bäsdeşlik has-da güýçlenip biler.
Gurmanyň pikiriçe, Apple kompaniýasy öz enjamyny özboluşly dizaýn, iPhone bilen berk utgaşmagy we brendiň dünýädäki meşhurlygy arkaly öňe çykarmaga synanyşar.
