Apple kompaniýasy iPhone smartfonlaryny köçede ogurlamak ýa-da elden çekip almak synanyşygy bolanda, enjamy awtomat gurup goýjak täze funksiýanyň üstünde işleýär. Bu barada 9to5Mac neşiri habar berdi.
Ulgam smartfonuň eýesiniň elinden duýdansyz we örän çalt çekilip alnan pursadyny anyklamak üçin birnäçe datçikleri, şol sanda akselerometri (hereket datçigini) ulanar. Bu duýduryş işläp başlan badyna enjam awtomat ýagdaýda gulplanar.
Täze funksiýa, şeýle hem, ulanyjynyň «Apple Watch» akylly sagadyna çenli bolan aralygy, öňden tanyş Wi-Fi ulgamlaryna birigişini we adamyň ýerleşýän ýerini (meselem, öýüni ýa-da iş ýerini) göz öňünde tutar. Eger ulgam çak edilýän ogurlykdan soň iPhone-yň nätanyş ýere äkidilendigini anyklasa, şahsy akkauntlara we gizlin maglumatlara giriş çäklendiriler.
Bu täze aýratynlyk entek resmi taýdan tanyşdyrylmady.
9to5Mac neşiriniň ýazmagyna görä, onuň işlenip düzülýändigini görkezýän alamatlar operasion ulgamyň kodlarynyň içinden tapyldy.
Android smartfonlarynda şeýle funksiýa eýýäm 2024-nji ýylda peýda bolupdy. Ol ýerdäki «Theft Detection Lock» funksiýasy hem edil şu maksat bilen işleýär. Eger siz ýöräp, ylgap ýa-da welosipedli barýarkaňyz telefonyňyz elňizden duýdansyz çekilip alynsa, emeli aň datçikleriň (akselerometr, giroskop) maglumatlaryny seljerip, muny howp hökmünde kabul edýär we ekrany gulplaýar.
Android-de bu funksiýany nähili açmaly?
- Android enjamyňyzda «Sazlamalar» (Настройки) bölümine giriň.
- Google ➔ Ähli hyzmatlar (Все сервисы) ugruna geçiň.
- «Ogurlykdan goranmak» (Lost device protection / Защита от кражи) bendini saýlaň.
- «Ogurlygy anyklap gulplamak» aýratynlygyny işe giriziň.
- Pişiklerden goranmak üçin «Cats Lock» programmasy
Mundan başga-da, Apple kompaniýasy macOS ulgamy üçin «App Store» dükanyna «Cats Lock» diýen gyzykly goşundyny goşdy. Bu programma, eger MacBook noutbugynyň klawiaturasynyň üstüne pişik çyksa, ony awtomat gulplaýar.
Bu programmany garaşsyz programmaçy Todd Aleksander döretdi we ony 3 dollara satyn alyp bolýar. Haýwan klawiaturanyň düwmelerine basan wagty «Cats Lock» duýduryş sesini berýär, ulanyjy bolsa bu signal üçin islän sesini goýup bilýär. Programmada hiç hili ses we wizual duýduryş bermeýän gizlin düzgün hem bar.
