Infarkt bilen iş gutaranok: ýüregiň bellibir derejede gutulyp bilýänligi anyklanyldy

Awstraliýaly alymlar infarktdan soň adamyň ýüreginiň täze ýürek myşsalarynyň öýjüklerini emele getirip bilýändigini ýüze çykardylar. Bu, organyň doly dikelmegi diýmek bolmasa-da, şeýle ýagdaýda ýüregiň diňe çat açmak bilen çäklenmeýändigi baradaky möhüm hem teselli beriji täzelikdir.
Infarkt wagtynda adamyň gan aýlanyşygy bozulýar we kislorod ýetmezçiligi sebäpli ýürek öýjükleri ölýär. Organizm şikeslenen ýeri gysylmaga ukypsyz çatlan dokumasy bilen ýapýar, netijede ýüregiň işlemegi kynlaşýar. Wagtyň geçmegi bilen bu ýagdaý gaýtalanýan tutgaýlara we ýürek ýetmezçiligine eltip bilýär.
Mundan ozal, syçanlarda dokumalaryň täzelenmegi yzygiderli subut edilse-de ynsanyň ýürek öýjükleriniň şikesden soň bölünmegi tas mümkin däl diýlip hasaplanýardy. Täze barlag bolsa bu bölünmäniň adamda hem bolup geçýändigini aýan etdi.
Alymlar barlagda beýni ölümi hasaba alnan adamyň donorlyk ýüregini we şuntirleme operasiýasyny geçiren näsaglaryň dokuma nusgalaryny öwrendiler. Olar genleriň işjeňligini, beloklary we madda çalşygyny seljerdiler. Gan bilen üpjünçiligi pes bolan dokumalarda alymlar öýjükleriň bölünme alamatlaryny we ozal diňe gemrijilerde geçirilen barlaglardan mälim bolan molekulýar yzlary tapdylar.
Işiň awtorlary täze öýjükleriň tebigy usulda emele gelmeginiň infarktdan soň ýüregi doly dikeltmek üçin ýeterlik däldigini nygtaýarlar. Şeýle-de bolsa, bu netijeler şol prosesi güýçlendirip biljek bejergi usullaryny işläp taýýarlamak üçin täze mümkinçilikleri açýar.
Ylmy iş Circulation Research žurnalynda çap edildi.