Podiumdan ýeňiş münberine tarap: dünýä brendleri gyşky Olimpiadany moda görkezilişige öwürjek

Milan gyşky Olimpiada taýýarlanýar, ýöne bu gezek ol diňe bir sport äleminiň möhüm wakasy bolmak bilen çäklenmejek ýaly. Çünki türgenleriň medal ugrunda göreşýän wagty, meşhur lybas brendleri hem pursatdan peýdalanyp, tomaşaçylaryň gözlerini eglemek ugrunda bäsleşmegi ýüregine düwdiler. Şol sebäpli ýakyn günlerde Olimpiýa oýunlary bilen birlikde, Milan planetanyň iň uly moda podiumyna öwrüler diýip arkaýyn aýtsa bolar.
Olimpiýa oýunlarynyň 6-njy fewralda geçiriljek açylyş dabarasy onlarça ýyllap dünýä modasynyň ugruny kesgitläp gelýän şäherde bolar we ol Jorjio Armaniniň ýagty ýadygärligine bagyşlanar. Şunlukda guramaçylar bu ýylky gyşky oýunlaryň taryha iň nepis we kaşaň oýunlar hökmünde girjekdigini wada berýärler.
Italiýanyň ýygyndy topary stadiona Armaniniň iň soňky döreden ajaýyp lybaslarynyň birinde çykar.

Moncler brendi Braziliýanyň ýygyndysy üçin ýörite sport lybaslaryny işläp düzdi.

Li-Ning Hytaý bilen tas ýigrimi ýyllyk arakesmeden soň hyzmatdaşlygy täzeledi.
Ralph Lauren bassyr onunjy gezek ABŞ-nyň ýygyndysyny öz lybaslaryna besleýär.  Brendiň dabaraly lybaslaryny islendik adam satyn alyp bilýär, olardan gelýän girdeji bolsa türgenleri goldamak üçin harçlanylýar.

Kanada bu gezek lybaslary  üýtgetmäge isleg bildirdi. Şoňa görä, gyzyl klýon ýapragy şekillendirilen sargy palto şarfa ýa-da guşaga öwrüler.

Fransiýa öz garderobyny olimpiýa obasyndan başlap, tä podiuma çenli üç görnüşe böldi.

Beýik Britaniýa dabara lybaslaryny «Ben Sherman» brendine, sport çykyşlaryndakylaryny bolsa «adidas»-a ynandy.