Türkmenistanyň ýokary okuw mekdepleriniň talyplary BIMO-2026 we BIChO-2026 halkara olimpiadalarynda 17 altyn, 17 kümüş we 12 bürünç baýraga mynasyp boldy diýip, Halkara ynsanperwer ylymlary we ösüş uniwersiteti habar berýär.
Matematika we himiýa boýunça intellektual bäsleşikler 25-28-nji ýanwar aralygynda Buhara döwlet uniwersitetinde geçirildi.
Bu bäsleşiklere dünýäniň 10-dan gowrak döwletinden, şol sanda Özbegistandan, Russiýadan, Hytaýdan, Hindistandan, Pakistandan, Azerbaýjandan, Iordaniýadan we Täjigistandan 500-den gowrak talyp we 100 topar gatnaşdy.
Bäsleşikleriň maksatnamasy şahsy we toparlaýyn tapgyrlardan ybarat boldy. Matematikler analiz, çyzykly algebra, san teoriýasy we kombinatorika boýunça meseleleri çözdi. Himiýa boýunça bäsleşiklere gatnaşyjylar bolsa organiki däl, organiki we fiziki himiýa ugurlaryndan öz bilimlerini görkezdi.
Bäsleşik böleginden başga-da, takyk ylymlary öwretmegiň usullary boýunça tejribe alyşmak maksady bilen professor-mugallymlaryň duşuşyklary geçirildi.
Türkmen talyplary BIMO-2026 we BIChO-2026 olimpiadalarynda 46 medal gazandy
- 02.02.2026 02:12
- 2.7k+
