Fewral aýyndan başlap BMW awtokonserni, hereketlendirijiniň görnüşine garamazdan, ähli modellerinde täzelenen nyşany ulanar.
Berlen maglumatlara görä, täze dizaýnda içki hrom halkadan we reňkli bölekleriň gyrasyndaky germewlerden ýüz öwrüldi. Bawariýanyň baýdagynyň gök we ak reňkleri has doýgunlaşdy, gara reňkli halka bolsa öňki ýalpyldawuk görnüşiň deregine öwüşginsiz boldy.
Mundan ozal gibrid we elektrik modeller açyk gök reňkli daşky halkasy bilen tapawutlandyrylýardy, ýöne öndüriji indi bu tapawutlandyrmadan hem ýüz öwürmek kararyna geldi.
Üýtgedilen logotip ilkinji gezek 2026-njy model ýylynyň iX3 krossowerinde görkezildi. Brendiň wekilleri 51145A7A678 katalog belgili bu täze nyşanyň öňki ýyllarda öndürilen awtomobillere laýyk gelmezliginiň mümkindigini duýdurýar. Mälim bolşuna görä, täze logotip ulaglaryň kapotynda peýda bolar, ýöne onuň bagaž ýerinde, rulda we tigirleriň ortasynda ulanyljakdygy entek resmi taýdan tassyklanmady.
Şeýle-de, «M» seriýasynyň hem täzelenen nyşana geçiriljekdigi yglan edildi. Logotipiň nähili görnüşde boljakdygy häzirlikçe belli däl, ýöne onuň hem has «tekiz» dizaýna eýe bolmagy mümkin.
