Hywada suw hojalyk meseleleri boýunça türkmen-özbek hökümetara toparynyň mejlisi geçirildi

30-njy ýanwarda Hywada Suw hojalyk meseleleri boýunça bilelikdäki türkmen-özbek hökümetara toparynyň bäşinji mejlisi geçirildi. Bu barada Türkmenistanyň Daşary işler ministrliginiň metbugat gullugy habar berdi.
Duşuşykda türkmen wekiliýetine Türkmenistanyň Ministrler Kabinetiniň Başlygynyň orunbasary T. Atahallyýew, özbek wekiliýetine bolsa Özbegistan Respublikasynyň Prezidentiniň oba hojalygyny ösdürmek meseleleri boýunça geňeşçisi Ş. Ganiýew ýolbaşçylyk etdi. Maslahata irrigasiýa we daşky gurşawy goramak meselelerine jogapkär ministrlikleriň hem-de döwlet edaralarynyň ýolbaşçylary gatnaşdy.
Gepleşikleriň dowamynda taraplar sebitiň azyk howpsuzlygyny we durmuş-ykdysady durnuklylygyny üpjün etmekde suw serişdelerini dolandyrmak ulgamyndaky hyzmatdaşlygyň strategik ähmiýetini nygtady.
Taraplar suw serişdelerini rejeli peýdalanmak boýunça tehnologiýalary ornaşdyrmak, suw serişdelerine gözegçilik etmek we hasaba almak mehanizmlerini kämilleşdirmek meselelerine seretdi. Wekiller howanyň üýtgemegine uýgunlaşmak we suw üpjünçiligi üçin töwekgelçilikleri azaltmak boýunça görülýän çärelere aýratyn üns berdi.
Duşuşygyň barşynda yzygiderli ikitaraplaýyn geňeşmeleri geçirmäge we hyzmatdaşlygyň hukuk binýadyny berkitmäge ygrarlylyk tassyklanyldy.
Mejlisiň netijeleri boýunça taraplar Suw hojalyk meseleleri boýunça bilelikdäki türkmen-özbek hökümetara toparynyň bäşinji mejlisiniň Teswirnamasyna gol çekdi.