Gurbanguly Berdimuhamedow «Arkadag»–«Al-Nasr» oýnunyň öňüsyrasy Olimpiýa stadionyny gözden geçirdi

Türkmenistanyň Halk Maslahatynyň Başlygy Gurbanguly Berdimuhamedow paýtagtymyzdaky Olimpiýa şäherçesine baryp, Olimpiýa stadionynyň öňde boljak halkara futbol bäsleşigine taýýarlyk derejesi bilen tanyşdy. Gürrüň AFK-nyň Çempionlar ligasy-2 bäsleşiginiň 1/8 finalynyň çäginde geçiriljek «Arkadag» futbol topary bilen Saud Arabystanynyň «Al-Nasr» toparynyň arasyndaky duşuşyk barada barýar, diýip «Watan» habarlar gepleşiginde aýtdylar.
Saparyň dowamynda Gurbanguly Berdimuhamedow Merkezi Aziýada iň uly hasaplanýan 45 müň orunlyk Olimpiýa stadionynyň mümkinçiliklerini, meýdançanyň ýagdaýyny, tomaşaçylar üçin niýetlenen oturgyçlary hem-de türgenler we tälimçiler üçin döredilen şertleri gözden geçirdi. Türkmen halkynyň Milli Lideri ähli desgalaryň halkara talaplaryna laýyk gelmelidigini we ýaryşyň guramaçylyk meseleleriniň hemişe gözegçilikde saklanmalydygyny nygtady.
Bäsleşigiň nyşanlaryna hem aýratyn üns berildi. 2017-nji ýylda Ýapyk binalarda we söweş sungaty boýunça V Aziýa oýunlarynyň esasy nyşany bolan alabaýyň şekiliniň bu gezekki halkara futbol ýaryşy üçin hem emblema hökmünde saýlanyp alynmagynyň ähmiýeti bellenildi.
Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D. Orazow stadionyň futbol meýdançasynyň halkara standartlaryna doly laýyk gelýändigi, türgenleşikler we oýunlar üçin ähli şertleriň bardygy barada hasabat berdi. Bellenilişi ýaly, oýun geçirilmeýän wagtlarynda meýdançadaky ot ýörite gorag örtügi bilen örtülýär.
Halk Maslahatynyň Başlygy ýaryşyň köpçülikleýin habar beriş serişdelerinde giňden beýan edilmeginiň we häzirki zaman tehnologiýalarynyň netijeli ulanylmagynyň wajypdygyny belledi. Gurbanguly Berdimuhamedow bu halkara duşuşygyň ýurdumyzyň sport abraýy üçin ähmiýetiniň uludygyny belläp, taýýarlyk işlerine hemmetaraplaýyn esasda çemeleşmegi tabşyrdy.
Ýatladyp geçsek, «Arkadag» bilen «Al-Nasryň» arasyndaky birinji duşuşyk Aşgabatda 11-nji fewralda geçiriler, oýun 18:45-de başlar. Jogap duşuşyk Saud Arabystanynyň Er-Riýad şäherinde bir hepde soň, 18-nji fewralda geçer, oýun 23:15-de başlar.