Türkiýäniň syýahatçylyk boýunça girdejisi rekord derejä ýetdi

2025-nji ýylda Türkiýäniň syýahatçylykdan alan girdejileri öňki ýyl bilen deňeşdirilende 6,8% artyp, 65,2 milliard dollara ýetdi. Bu barada Dunya neşiri ýurduň medeniýet we syýahatçylyk ministri Mehmet Nuri Ersoýuň sözlerine salgylanyp habar berýär.
2026-njy ýylda bu görkezijini 68 milliard dollara çenli ýokarlandyrmak meýilleşdirilýär.
Ministriň aýtmagyna görä, geçen ýyl ýurda 64 million syýahatçy geldi. «Türk syýahatçylygy diňe bir sebit derejesinde däl, eýsem dünýä derejesinde hem täsirli güýje öwrüldi» diýip, Ersoý bu hakda aýratyn belledi.
Ol UN Tourism guramasynyň maglumatlaryna salgylanyp, Türkiýäniň 2017-nji ýylda daşary ýurtly syýahatçylaryň sany boýunça dünýäde sekizinji orunda durandygyny, 2024-nji ýyla çenli bolsa dördünji orna çenli göterilendigini ýatlatdy. Pudakdan gelýän girdejileriň derejesi boýunça ýurt 2017-nji ýyldaky 15-nji orundan 2024-nji ýylda ýedinji orna çykdy.
Ersoý Türkiýedäki syýahatçylygyň eýýämden bäri diňe bir deňiz we plýaž dynç alşy bilen çäklenmeýändigini hem nygtady. Sebitler syýahatlaryny medeni, dini, tebigy, ekologik, arheologik, sagaldyş, gastronomiýa, kongres-sergiler, gyşky we beýleki ugurlar boýunça hem barha giňeldýärler.