Google DeepMind kompaniýasy keselleriň döremegine täsir edýän genetiki faktorlary ýüze çykarmak üçin niýetlenen AlphaGenome atly emeli aň guralyny tanyşdyrdy. Bu model bir wagtyň özünde DNK kodunyň 1 milliona çenli belgisini seljermäge ukyplydyr, bu bolsa täze bejeriş usullaryny işläp düzmäge ýardam eder diýip, The Guardian neşiri habar berýär.
Işläp düzüjiler ulgamy adamyň we syçanyň açyk genetiki maglumatlar binýady esasynda döretdiler. Şonuň netijesinde, programma belli bir dokumalardaky mutasiýalar bilen olaryň biologik düzüjilere ýetirýän täsiriniň arasyndaky baglanyşygy anyklady. Algoritm koddaky üýtgeşmeleriň genleri dolandyrmak mehanizmlerine, şol sanda olaryň işjeňleşýän wagtyna we biologik işjeňlik derejesine nähili täsir edýändigini çaklaýar.
Barlagçylaryň bellemegine görä, ýürek keselleri we autoimmun bozulmalary ýaly giňden ýaýran patologiýalaryň köpüsi genleriň düzgünleşdirilişiniň bozulmagy sebäpli ýüze çykýar. AlphaGenome anyk näsazlyklary tapmaga we DNK-nyň täze yzygiderliligini modelirlemäge mümkinçilik berýär.
«Biz AlphaGenome-a genomuň funksional elementleriniň näme üçin jogapkärdigine düşünmek üçin bir gural hökmünde garaýarys. Bu bolsa, durmuş koduna bolan düýpli düşünjämizi çaltlandyrar diýip umyt edýäris» diýip, DeepMind kompaniýasynyň barlagçysy Nataşa Latyşewa belledi.
