Aba Annaýew adyndaky Halkara atçylyk akademiýasy Kataryň Atçylyk federasiýasy bilen ähtnama gol çekdi

2026-njy ýylyň 29-31-nji ýanwary aralygynda Aba Annaýew adyndaky Halkara atçylyk akademiýasynyň wekiliýetiniň Katar Döwletine amala aşyran iş saparynyň çäklerinde Kataryň Atçylyk federasiýasy bilen özara düşünişmek hakynda Ähtnama gol çekildi. Bu ylalaşyk ylym, bilim, innowasiýalar we atçylyk sporty ugrundaky hyzmatdaşlygy ösdürmäge gönükdirilendir diýip, Akademiýanyň saýty habar berýär.
Ähtnama Kataryň Atçylyk federasiýasynyň Prezidenti Bader Mohammed Al-Darwişiň, Kataryň Emiriniň «Al Shaqab» atçylyk toplumynyň ýerine ýetiriji başlygynyň orunbasary Halid Abdulla Al-Hatmiň we Aba Annaýew adyndaky halkara atçylyk akademiýasynyň rektory, oba hojalyk ylymlarynyň kandidaty, Türkmenistanyň Halk atşynasy Pygy Baýramdurdyýewiň gatnaşmagynda geçirilen duşuşykda gol çekildi.
Bu ylalaşyk atçylyk sporty ulgamyndaky ikitaraplaýyn gatnaşyklaryň hukuk binýadyny berkitdi, şeýle hem tejribe alyşmakda we pudak üçin hünärmenleri taýýarlamakda täze mümkinçilikleri döretdi. Resminama iki ýurduň degişli bilim we sport düzümleriniň arasyndaky özara hereketleri ösdürmegi göz öňünde tutýar.
Duşuşygyň dowamynda taraplar bu hyzmatdaşlygyň Türkmenistan bilen Katar Döwletiniň arasyndaky ynsanperwer we sport ulgamlaryndaky dostlukly gatnaşyklaryň mundan beýläk-de giňelmegine ýardam etjekdigini belledi.