Brýusselde geçirilen Ýewropa kosmos maslahatynda Meteosat hemrasynyň üçünji nesline degişli bolan MTG-S (Sounder) hemrasyndan alnan ilkinji suratlar jemgyýetçilige hödürlendi. Bu suratlar missiýanyň atmosferanyň temperaturasy we çyglylygy baradaky maglumatlary ýygnamak ukybyny subut edýär. Bu maglumatlar Ýewropada we Demirgazyk Afrikada howa çaklamalarynyň takyklygyny täze derejä çykarar.
Hemra Ýer ýüzünden takmynan 36 000 kilometr beýiklikde, geostasionar orbitada ýerleşýär. Ýewropa Kosmos Agentligi (ESA) tarapyndan işlenip düzülen MTG maksatnamasy meteorologiýa we howanyň hiline gözegçilik etmekde innowasion böküş etmegi maksat edinýär.
Geostasionar ýerleşişi sebäpli, MTG-S umumy howa maglumatlaryny her 15 minutdan, atmosferanyň temperaturasy we çyglylygy baradaky maglumatlary bolsa her 30 minutdan täzeleýär. Bu täze maglumatlar eýýäm orbitada duran MTG-Imager hemrasynyň berýän bulutlar we ýyldyrymlar baradaky maglumatlarynyň üstüni ýetirýär.
MTG-S infragyzyl zondy geostasionar orbitadaky ilkinji Ýewropa giperspektral guralydyr.
Geljekde alynjak ölçegleriň esasynda atmosferanyň üç ölçegli (3D) kartalaryny döretmek meýilleşdirilýär. Bu bolsa gysga möhletli çaklamalary has-da kämilleşdirer we duýdansyz turýan güýçli tupanlara gözegçilik etmäge mümkinçilik berer.
