Aşgabatda geçiriljek sergä Türkiýäniň 100-e golaý kompaniýasy gatnaşar

Şu ýylyň fewral aýynda paýtagtymyzda Türkiýe Respublikasynyň eksport harytlarynyň sergisini geçirmek meýilleşdirilýär. Bu çärä gatnaşmak üçin Türkiýäniň dürli ugurlarda ýöriteleşen 100-e golaý kompaniýasy hasaba alyndy. Bu barada «Watan» habarlar gepleşiginde habar berildi.
30-njy ýanwarda geçirilen Hökümet mejlisiniň barşynda wise-premýer N.Atagulyýew sergini ýokary guramaçylyk derejesinde geçirmek üçin görülýän taýýarlyk barada hasabat berdi.
Sergide Türkiýäniň dürli ugurlarda iş alyp barýan kärhanalary öz önümlerini we hyzmatlaryny tanyşdyrarlar. Bu kompaniýalar enjamlary we tehniki serişdeleri, binalaryň ýyladyş we sowadyş ulgamlaryny, himiki serişdeleri, demir we elektron harytlary we beýleki önümleri öndürijiler we eksport edijiler bolup durýarlar. Mundan ötri sergi meýdançalarynda gurluşyk, energetika, logistika we bilim ulgamlarynda iş alyp barýan türk kärhanalarynyň hyzmaty bilen tanyşmaga mümkinçilik dörediler.
Prezidentim Serdar Berdimuhamedow hasabaty diňläp, daşary ýurtlar bilen söwda-ykdysady gatnaşyklary ösdürmegiň we bu ugurda alnyp barylýan işleriň netijeliliginiň ähmiýetini belledi. Döwlet Baştutanymyz Türkiýe Respublikasynyň eksport harytlarynyň sergisine gowy taýýarlyk görmegi we ony guramaçylykly geçirmegi wise-premýere tabşyrdy.
Türkiýe Respublikasynyň eksport harytlarynyň sergisi Aşgabatda 2026-njy ýylyň 10-12 fewral günleri geçiriler.