«Galatasaraý» futbol kluby täze girdeji çeşmesini — «GS Store Cafe» brendi bilen kafeler ulgamyny işe girizmegi meýilleşdirýär. Taslama françaýzing modeli boýunça ösdüriler we Türkiýäniň ähli çäklerini öz içine alar.
«HT Spor» neşiriniň berýän maglumatlaryna görä, klub ýurduň 81 welaýatynyň her birinde öz nokatlaryny açmakçy bolýar. Maýadarlary çekmek üçin françaýzing ulgamy ulanylar: «GS Store Cafe» brendi astynda işlemek hukugy 50 müň dollar diýlip hasaplanylýar.
Taslama giň täjirçilik ulgamyny kemala getirmäge we hyzmatdaşlardan durnukly girdeji almaga gönükdirilendir.
Şeýle hem, Galatasaray Mağazacılık AŞ kompaniýasyny öz içine alýan söwda gurluşynyň geljekde 700 million dollar töweregi bahalandyrma bilen biržada ýerleşdirilip (IPO) bilinjekdigi habar berilýär. Bu ädimiň uly möçberli maliýe serişdelerini çekmäge mümkinçilik bermegine garaşylýar.
Taslamany amala aşyrmagyň ilkinji tapgyrynda klub, takmynan, 150 million dollar girdeji almagy umyt edýär. Ýolbaşçy düzüm bu täze ugruň ösdürilmeginiň «Galatasaraýyň» maliýe mümkinçiliklerini has-da güýçlendirjekdigine ynanýar.
