Türkmen döwlet binagärlik-gurluşyk instituty 20–21-nji aprel aralygynda onlaýn formatda «IT-Zehin: Sanly Synag – 2026» atly talyplar hakatonyny geçirer. Bu barada maglumaty ýokary okuw mekdebiniň metbugat gullugy berýär.
Intellektual bäsleşige gatnaşmaga ýurduň ýokary we orta hünär okuw mekdepleriniň talyplary çagyrylýar. Bäsleşik toparlaýyn we aýratynlykda gatnaşylýan görnüşde geçirilýär. Her bir okuw edarasy üç talypdan ybarat bolan bir topary hödürläp biler. Çäräniň maksatnamasy test soraglaryny öz içine alýar we olary ýerine ýetirmek üçin 60 minut wagt berilýär.
Eminler toplanan utuklaryň esasynda Gran-pri baýragynyň eýesini kesgitlär. Şeýle-de, baýrakly orunlaryň hatarynda iki sany birinji, dört sany ikinji we bäş sany üçünji orun göz öňünde tutulýar. Ýeňijiler degişli derejeli diplomlar bilen sylaglanar.
Bäsleşige gatnaşmaga isleg bildirýänler bellenen nusga boýunça doldurylan anketany 6-njy aprele çenli sedahojayev06@gmail.com elektron salgysyna ugratmalydyr. Goşmaça maglumatlar institutyň resmi saýtynda ýerleşdirilen.
Hakaton bäsleşiginiň guralmagy ýaşlaryň döredijilik we innowasion ukyplaryny ösdürmäge, IT-başarnyklaryny, seljeriş ukybyny hem-de topar bolup işlemek başarnygyny kämilleşdirmäge gönükdirilendir.
Türkmenistanda talyplaryň arasynda «IT-Zehin: Sanly Synag – 2026» hakaton bäsleşigi geçiriler
- şu gün 03:36
- 49
