Türkmenistanyň ilçisi Azerbaýjanyň Prezidentiniň kömekçisi bilen duşuşdy

Türkmenistanyň Bakuwdaky ilçisi Gurbanmämmet Elýasow bilen Azerbaýjan Respublikasynyň Prezidentiniň kömekçisi, Prezident Diwanynyň Daşary syýasat meseleleri bölüminiň müdiri Hikmet Hajiýew ikitaraplaýyn hyzmatdaşlygyň häzirki ýagdaýyny we geljekki ugurlaryny ara alyp maslahatlaşdy. Bu barada Türkmenistanyň DIM-niň metbugat gullugy habar berdi.
Taraplar 2025-nji ýylyň netijelerini seljerip, ony döwletara gatnaşyklarynyň taryhynda möhüm tapgyr hökmünde häsiýetlendirdi. Geçen döwrüň ýokary derejeli saparlar we medeni-ynsanperwer gatnaşyklaryň giňelmegi bilen utgaşandygy bellenildi.
Söhbetdeşler Türkmenistanyň Prezidenti Serdar Berdimuhamedowyň we Azerbaýjanyň Prezidenti Ilham Aliýewiň, şeýle-de Türkmenistanyň Halk Maslahatynyň Başlygy Gurbanguly Berdimuhamedowyň başlangyçlary netijesinde energetika, söwda we ulag ulgamlarynda, şol sanda Orta geçelgäni ösdürmekde hyzmatdaşlygyň berkeýändigini nygtady.
Gepleşikleriň dowamynda taraplar 2026-njy ýyl üçin meýilleşdirilen halkara forumlaryň we çäreleriň tertibine seretdi. 2026-njy ýylyň güýzünde Türkmenistanda geçirilmegi meýilleşdirilýän Merkezi Aziýa ýurtlarynyň we Azerbaýjanyň döwlet Baştutanlarynyň 8-nji Konsultatiw duşuşygyna görülýän taýýarlyga aýratyn üns berildi. Duşuşyga gatnaşyjylar Azerbaýjanyň bu formata doly hukukly agza hökmünde gatnaşmagynyň sebit gepleşikleriniň işjeňleşmegine ýardam etjekdigini belledi.