Türkmenistanyň DIM-inde Russiýa bilen strategik hyzmatdaşlygyň ileri tutulýan ugurlary maslahatlaşyldy

29-njy ýanwarda Türkmenistanyň Daşary işler ministrliginde Raşid Meredowyň Russiýa Federasiýasynyň daşary işler ministriniň orunbasary Mihail Galuzin bilen duşuşygy boldy.
Taraplar türkmen-rus strategik hyzmatdaşlygyny mundan beýläk-de ösdürmäge ygrarlydyklaryny tassyklady. Ikitaraplaýyn gatnaşyklary berkitmekde ýokary derejedäki yzygiderli duşuşyklaryň we gatnaşyklaryň möhüm orun tutýandygy bellenildi.
M. Galuzin Türkmenistanyň halkara giňişligindäki işjeňligine ýokary baha berip, onuň ýurduň hemişelik Bitaraplyk derejesine doly laýyk gelýändigini nygtady.
Gepleşikleriň dowamynda syýasy-diplomatik, söwda-ykdysady we medeni-ynsanperwer ulgamlardaky hyzmatdaşlygyň esasy ugurlaryna seredildi. Halkara meýdançalaryndaky özara gatnaşyklara aýratyn üns berildi. Türkmenistanyň we Russiýanyň Birleşen Milletler Guramasynyň çäklerindäki hyzmatdaşlygynyň ýokary derejesi bellenildi.
Şeýle-de, GDA formatyndaky hyzmatdaşlygyň ähmiýeti nygtalyp, onuň çäklerinde şu ýyl Türkmenistanyň başlyklyk edýändigi aýdyldy.
Mundan başga-da, diplomatlar halkara we sebit gün tertibiniň möhüm meseleleri boýunça pikir alyşdy.