Tähranda YHG-yň sebitinde Hereketleriň Awaza maksatnamasyny durmuşa geçirmek meseleleri ara alnyp maslahatlaşyldy

27-nji ýanwarda Tähranda Ykdysady Hyzmatdaşlyk Guramasyna (YHG) agza döwletleriň Hemişelik wekilleriniň Geňeşiniň nobatdaky mejlisi geçirildi. Onda 2024–2034-nji ýyllar üçin Hereketleriň Awaza maksatnamasyny durmuşa geçirmegiň gidişine garaldy. Bu barada Türkmenistanyň Daşary işler ministrliginiň metbugat gullugy habar berýär.
Mejlisiň dowamynda Gurama tarapyndan maksatnamanyň üçünji ileri tutulýan ugry bolan «Üstaşyr, ulag we özara baglanyşyk» atly bölümini YHG-yň sebitinde amala aşyrmak boýunça taslama hödürlendi. Geňeş bu teklibi, şeýle hem ony iş ýüzünde durmuşa geçirmäge bagyşlanan duşuşyklaryň guralmagyny goldady.
Türkmenistanyň ilçisi, YHG-yň ýanyndaky Hemişelik wekili I. Gaýypow bu başlangyjyň goldanylandygy üçin YHG-yň Sekretariatyna we agza döwletleriň wekillerine minnetdarlyk bildirdi hem-de taslamany ýerine ýetirmekde ähli taraplaryň işjeň gatnaşmagynyň möhümdigini belledi.
Şeýle-de, mejlise gatnaşyjylara «2024–2034-nji ýyllar üçin Hereketleriň Awaza maksatnamasy we YHG sebiti» atly mowzuk boýunça BMG-niň Deňze çykalgasy bolmadyk ösüp barýan ýurtlar boýunça üçünji maslahatynyň çäklerinde Gurama tarapyndan alnyp barlan işler hem-de öňde duran meýilnamalar barada maglumat berildi.
Mundan ozal, türkmen tarapynyň teklibi bilen maksatnamanyň üçünji ileri tutulýan ugry YHG-yň ýakyn wagtda kabul edilmegine garaşylýan «Ykdysady hyzmatdaşlygyň strategik maksatlary — 2035» resminamasynyň taslamasynda öz beýanyny tapypdy. Şeýle-de, YHG-yň resmi saýtynda Hereketleriň Awaza maksatnamasyna bagyşlanan ýörite bölüm döredildi.