Watan goragçylarynyň güni mynasybetli harby we hukuk goraýjy edaralara Türkmenistanyň Prezidenti, ýurduň Ýaragly Güýçleriniň Belent Serkerdebaşysy Serdar Berdimuhamedowyň adyndan döwrebap awtoulaglar sowgat berildi. Dabara Türkmenistanyň Goranmak ministrliginiň Harby institutynda geçirildi diýip, «Milli goşun» žurnaly habar berýär.
Suratlardan görnüşi ýaly, sowgat berlen awtoulaglar orta göwrümli Mercedes-Benz GLE-Class krossowerleridir.
Döwlet Baştutanynyň tagallalary bilen täze tehnikalary hem-de tehnologiýalary ornaşdyrmagyň, döwrebap awtoulaglary satyn almagyň netijesinde ýurduň harby we hukuk goraýjy edaralarynyň maddy-enjamlaýyn binýady yzygiderli döwrebaplaşdyrylýar. Bu işler harby gullukçylaryň iş netijeliligini we harby hünäre höwesini artdyrmaga gönükdirilendir.
Täze awtoulaglary baýramçylyk sowgady hökmünde kabul eden harby gullukçylar döwlet Baştutanyna Watan goragçylaryna berýän ünsi we aladasy üçin minnetdarlyk bildirdi.
