Türkiýäniň söwda ministri Aşgabatda geçiriljek türk eksport harytlarynyň sergisine gatnaşar

2026-njy ýylyň 10–12-nji fewraly aralygynda Aşgabatda Türkiýe Respublikasynyň eksport önümleriniň 12-nji sergisi geçiriler. Serginiň açylyş dabarasyna öz ýurdunyň resmi wekiliýetine ýolbaşçylyk etmek bilen Türkiýe Respublikasynyň söwda ministri Omer Bolat gatnaşar.
Çäräniň guramaçylarynyň habar bermegine görä, sergä 100-e golaý kompaniýa we assosiasiýa gatnaşar. Serginiň esasy maksady türk harytlaryny türkmen bazarynda tanyşdyrmak we işewürlik gatnaşyklarynyň täze ýollaryny gözlemek üçin platforma döretmekden ybaratdyr. Omer Bolatyň Türkmenistana saparynyň meýilnamasy birnäçe ýokary derejeli duşuşyklaryň geçirilmegini göz öňünde tutýar.
Çärä gatnaşmaga türkmen işewürliginiň wekilleri çagyrylýar. Myhmanlar hödürlenýän brendleriň hil aýratynlyklary bilen tanşyp we hyzmatdaşlyk mümkinçiliklerini ara alyp maslahatlaşyp biler. Bu serginiň guralmagy iki ýurduň kärhanalary üçin täze söwda mümkinçilikleriniň giňelmegine ýardam eder.