Keniýaly ekologiýa işjeňçisi Trufena Mutoni 72 sagatlap agajy gujaklap saklap, dünýä rekordyny goýdy. Onuň bu üstünligi Ginnesiň rekordlar kitabyna girizildi.
22 ýaşly Mutoni agajyň ýanynda dynç almasyz üç gije-gündiz geçirdi. Ol bu hereketiniň üsti bilen daşky gurşawy goramagyň zerurlygyna ünsi çekmegi maksat edindi. Mundan ozalky rekord 50 sagatdan az-owlak gowrak bolupdy.
Bu Mutoniniň ilkinji üstünligi däl. Ol 2025-nji ýylyň fewralynda hem agajyň ýanynda 48 sagat durup, meňzeş rekord goýupdy, ýöne soňra onuň netijesi ganaly Frederik Boakýe tarapyndan täzelenipdi.
«Birinji synanyşyk bir arza, ýönekeý we mähirli hereket arkaly adamzady Ýer şary bilen täzeden tanyşdyrmagyň usulydy. Ikinji synanyşyk bolsa özboluşly bir borçdy. Men dünýäniň diňe bir görkezmeden has köp zada mätäçdigine düşündim: oňa durnuklylyk, yzygiderlilik we planetanyň aladasyny etmegiň wagtlaýyn zat däldiginiň subutnamasy gerek» diýip, Mutoni belledi.
Ol birinji synanyşygyň tejribesiniň ikinji gezek has gowy taýýarlanmaga kömek edendigini aýtdy. Mutoni agyr çäklendirmelerden ýüz öwrüp, has köp suw içip başlady we maşklaryny azaltdy.
«Munuň uly ähmiýeti boldy, synanyşyk wagtynda fiziki ýadawlygy hiç duýmadym. Esasy mesele ukyçyllyk boldy, sebäbi öňündäki gün gowy uklap bilmändim. Umuman, bu tejribe maňa durnuklylygyň kynçylyk çekmek ýa-da özüňi zorlamak däl-de, eýsem taýýarlyk, deňagramlylyk we organizmiň mümkinçiliklerine hormat goýmakdygyny öwretdi» diýip, rekordçy gyz öz täsirleri bilen paýlaşdy.
