Fransiýanyň Milli assambleýasy 15 ýaşdan kiçi çagalara we ýetginjeklere sosial ulgamlaryny ulanmagy gadagan edýän kanun taslamasyny goldady. "Le Figaro" neşiriniň habar bermegine görä, resminama üçin 130 deputat: "Goldaýarys", 21 parlamentariý bolsa, "Garşy" diýip, ses berdi.
Sanly tehnologiýalar ministri Ann Le Enanffyň aýtmagyna görä, indiki tapgyrda bu başlangyç Ýokarky palatada, ýagny Senatda serediler. Bu ýagdaý ýakyn hepdelerde amala aşyrylmalydyr.
Şeýle hem Kanun taslamasy mekdeplerde we kollejlerde eýýäm hereket edýän öýjükli telefonlary ulanmak gadaganlygyny hem göz öňünde tutýar. Bu başlangyjyň awtorlary şeýle çäreleriñ geçirilmegi çagalary zyýanly mazmundan, ekrana garaşlylykdan, kemsitmekden we onlaýn yzarlamalardan goramak zerurlygy bilen düşündirýärler.
"Le Figaro" neşiri eger kanun gutarnykly kabul edilse, Fransiýanyň Ýewropada jemgyýetçilik ulgamlaryna girmek üçin ýaş çägini bellän ilkinji ýurt boljakdygyny belleýär.
"Biziň çagalarymyzyň beýnisi satlyk däl. Bu ne amerikan platformalaryna, ne-de hytaý ulgamlaryna degişli" — diýip, Fransiýanyň Prezidenti Emmanuel Makron X jemgyýetçilik ulgamynda ýazgy galdyrdy. Ol kanunyň indiki okuw ýylyndan güýje girip bilmegi üçin serediş prosedurasyny çaltlandyrmagy talap etdi.
Mundan ozal Fransiýa kämillik ýaşyna ýetmedikler üçin sanly giňişligi çäklendirmäge synanyşypdy. 2023-nji ýylda häkimiýetler 15 ýaşdan "sanly kämillik" döwrüni girizmegi ara alyp maslahatlaşypdylar, emma ol wagt Ýewropa Bileleşiginiň kanunçylygy bilen dörän gapma-garşylyklar sebäpli bu başlangyjy durmuşa geçirip bilmändiler.
Ýakynda Awstraliýanyň parlamenti 16 ýaşdan kiçi çagalara sosial ulgamlaryny ulanmagy kanun taýdan eýýäm gadagan etdi. Bu, dünýäde şeýle gadagançylygyň kanun derejesini alan ilkinji ýagdaýydyr. Indi tehnologiýa äleminiň ägirtleri kämillik ýaşyna ýetmedik ulanyjylaryň platformalara girmezligi üçin çäre görmeli: düzgün bozulmalary 49,5 million awstraliýa dollaryna ($33 mln) çenli jerime salnar.
Meňzeş çäreler Daniýada hem ara alnyp maslahatlaşylýar.
