Amerikan telewideniýesinde režissýor Kristofer Nolanyň «Odisseýa» filminiň täze tizeri görkezildi. Wideorolikde meşhur repçi Trewis Skottuň hem peýda bolmagy köpçülikde uly seslenme döretdi.
«Deadline» neşiriniň ýazmagyna görä, reperiň filmdäki keşbi baradaky jikme-jiklikler häzirlikçe aýan edilmeýär.
Skott tizerdäki sahnada stoluň üstünde durup, bir topar esgere ýüzlenýär. Olaryň arasynda Tom Holand (Odisseýiň ogly Telemahyň keşbinde) we Jon Berntal (Menelaý) tarapyndan janlandyrylýan gahrymanlar hem bar.
Reperiň gatnaşmagyndaky kadrlar gysga wagtyň içinde sosial torlara giňden ýaýrady.
Bu, aslynda, Trewis Skott bilen Kristofer Nolanyň ilkinji hyzmatdaşlygy däldir. Mundan ozal sazanda režissýoryň 2020-nji ýylda ekranlara çykan «Ýörelge» («Tenet») filmi üçin «The Plan» atly aýdymyny ýazypdy.
«Odisseýanyň» aktýorlar düzüminde Mett Deýmon, Enn Heteueý, Robert Pattinson, Zendeýa we Şarliz Teron ýaly dünýä belli ýyldyzlar hem bar.
Film gadymy grek şahyry Gomeriň adybir epik poemasyna esaslanýar. «Odisseýanyň» uly ekranlara çykarylyşy 2026-njy ýylyň 17-nji iýulyna meýilleşdirilýär.
Nolanyň «Odisseýa» filmine repçi Trewis Skott gatnaşdy
- şu gün 13:13
- 324
