Bekmambetowyň täze filmi ABŞ prokatynda «Awatar 3-den» öňe saýlandy

Režissýor Timur Bekmambetowyň «Rehimdarlyk» (Mercy, rus prokatynda «Казнить нельзя помиловать») atly täze dartgynly ylmy-fantastik filmi geçen dynç günleriniň netijeleri boýunça Demirgazyk Amerikanyň kinoprokatynda birinji orna çykdy.
​Amazon MGM studiýasynyň bu filmi ABŞ-da 11,2 million dollar gazandy. Bu bolsa dynç günlerinde 7 million dollar girdeji alan «Awatar: Ot we kül» («Аватар: Огонь и пепел») filmini yzda galdyrmak üçin ýeterlik boldy.
​Filmiň umumy býujeti 60 million dollara barabardyr. Halkara bazarlarda film ýene-de 11,6 million dollar gazanyp, umumy girdejisini 22,8 million dollara ýetirdi. Onda baş keşpleri Kris Pratt we Rebekka Fergýuson janlandyrdy.
​Filmiň sýužeti aýalyny öldürmekde aýyplanýan polisiýa işgäri hakynda gürrüň berýär. Onuň öz bigünäligini emeli aň esasynda işleýän kazyýete subut etmek üçin bary-ýogy 90 minut wagty bar.
​Tomaşaçylaryň ünsüni çekip bilse-de, tankytçylar filme kembaha garadylar, onuň Rotten Tomatoes saýtyndaky reýtingi 21 göterime deň boldy.
​Variety neşiriniň ýazmagyna görä, «Rehimdarlyk» filminiň geçen dynç günleri Jeýms Kemeronyň kinosyndan öňe saýlanmagy köp babatda güýçli gar boragany sebäp boldy. Şeýle howada tomaşaçylaryň köpüsi, aýratyn hem maşgalaly adamlar kinoteatrlara gitmekden saklandylar.  Üstesine-de, ençeme ştatlarda kinoteatrlar işini wagtlaýyn togtatmaly boldy. Netijede, geçen dynç günleri şu ýylyň iň pes girdejili döwri boldy: ABŞ-nyň kinoteatrlary geçen ýylky görkezijiden 9 göterim az — jemi 60 million dollar gazandylar.