Aşgabatda Hindistanyň milli baýramy mynasybetli resmi kabul edişlik geçirildi

Aşgabatda Hindistanyň milli baýramy — Respublika güni mynasybetli «Ýyldyz» myhmanhanasynda dabaraly kabul edişlik geçirildi. Çärä Hindistanyň Türkmenistandaky Ilçisi Bandaru Wilsonbabu we Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow gatnaşdy.
Dabaranyň dowamynda taraplar Türkmenistan bilen Hindistanyň arasyndaky gatnaşyklaryň strategik häsiýete eýedigini hem-de gadymy taryhy we medeni köklere daýanýandygyny belläp geçdiler. Hindistanyň diplomatik wekilhanasynyň ýolbaşçysy öz ýurdunyň Türkmenistana «giňeldilen goňşuçylyk» syýasatynyň çäklerinde möhüm hyzmatdaşy hökmünde garaýandygyny aýtdy.
Taraplar nebit-gaz we himiýa senagaty, howpsuzlyk, saglygy goraýyş hem-de sanly ulgamlar ugurlarynda hyzmatdaşlygy ösdürmäge taýýardyklaryny bildirdiler. Şeýle hem BMG we «Hindistan – Merkezi Aziýa» dialogy ýaly halkara meýdançalaryň çäklerindäki gatnaşyklaryň ähmiýeti nygtaldy.
Raşid Meredow ýokary döwlet derejesindäki yzygiderli duşuşyklaryň hyzmatdaşlygyň esasy özeni bolup durýandygyny belledi. Soňky ýyllarda iki ýurduň ýolbaşçylarynyň amala aşyran saparlarynyň syýasy we ykdysady gatnaşyklaryň ösmegine itergi berendigini aýtdy.
Ýurtlaryň medeni-ynsanperwer gatnaşyklaryna hem aýratyn üns berilýär. 2024-nji ýylda Aşgabatdaky «Magtymguly Pyragy» medeni-seýilgäh toplumynda hindi şahyry Rabindranat Tagora ýadygärligiň dikilmegi hem munuň aýdyň subutnamalarynyň biridir.
Dabaraly agşam iki ýurduň aýdym-saz we tans toparlarynyň, şeýle hem Aşgabatdaky Ýoga merkeziniň wekilleriniň çykyşlary bilen dowam etdi.