Esenguly etrabynda prokuraturanyň täze edara binasy açyldy

Balkan welaýatynyň Esenguly etrabynda etrap prokuraturasynyň täze edara binasynyň açylyş dabarasy boldy. Dabaraly çäre Watan goragçylarynyň gününe bagyşlandy.
Iki gatly bina «Rysgally zähmet» kärhanasy tarapyndan gurlup, onda prokuratura işgärleriniň netijeli işlemegi üçin ähli amatly şertler döredildi. Iş otaglary ofis enjamlary, kompýuterler we mebel bilen üpjün edildi. Bina aragatnaşyk, ýyladyş, sowadyş ulgamlary we bökdençsiz elektrik üpjünçiligi bilen doly enjamlaşdyryldy.
Açylyş dabarasyna welaýat we etrap häkimlikleriniň wekilleri, harby gullukçylar, Halk Maslahatynyň agzalary, Mejlisiň deputatlary, jemgyýetçilik guramalarynyň wekilleri, hormatly ýaşulular we ýerli ýaşaýjylar gatnaşdy.

Binanyň gurluşygynda aýratyn tapawutlanan gurluşykçylara gymmat bahaly sowgatlar gowşuryldy.
Dabaraly çäre medeni maksatnama bilen utgaşyp, baýramçylyk sadakasy bilen jemlendi.