Watan goragçylarynyň gününiň öňüsyrasynda, Aşgabatda Içeri işler ministrliginiň işgärleriniň maşgalalary üçin ýörite gurlan Mälikguly Berdimuhamedow adyndaky kottejler toplumynyň täze tapgyry ulanmaga berildi. Bu barada THP habar berýär.
Täze ýaşaýyş toplumy bäş otagly 56 sany öýden ybaratdyr. Jaýlaryň gurluşy uly hojalyklaryň ýaşamagy üçin niýetlenip taslandy. Öýler döwrebap mebeller we durmuş tehnikalary bilen doly üpjün edildi, munuň özi jaý eýelerine açarlary alan badyna täze öýlerinde oňaýly şertlerde ornaşmaga mümkinçilik berýär.
Açylyş dabarasy milli däp-dessurlara laýyklykda geçirildi: täze jaýlaryň howlusynda zenanlar tamdyrda çörek bişirdiler, milli tagamlar bolan çelpekdir pişme taýýarladylar. Baýramçylyk gurşawyny dutaryň we taryň owazy, şeýle hem çagalar tans toparlarynyň çykyşlary has-da baýlaşdyrdy. Toý bagy kesilen pursadynda asmana dürli reňkli şarlar uçuryldy.
Türkmenistanyň Prezidenti Serdar Berdimuhamedowyň adyndan täze jaý eýelerine ýadygärlik sowgatlary gowşuryldy.
Baýramçylyk çäreleri ak öýleriň ýanynda dowam etdirildi. Ol ýerde milli senetçilik önümleriniň — halylaryň we zergärçilik şaý-sepleriniň sergisi guraldy. Dabaranyň ahyrynda «Miras» folklor topary «Küştdepdi» tansyny ýerine ýetirdi.
Aşgabatda IIM-niň işgärleriniň maşgalalary üçin täze ýaşaýyş jaý toplumy ulanylmaga berildi
- düýn 22:32
- 2k+
