Windows 11 üçin 13-nji ýanwarda çykan KB5074109 belgili howpsuzlyk täzelenmesi kompýuterleriň kadaly işe girizilmegine päsgel berýän çynlakaý näsazlygy ýüze çykardy. Microsoft bu ýalňyşlygyň bardygyny tassyklap, meseläni öwrenip başlandygyny habar berdi.
Täzelenme gurnalandan soň, ulanyjylaryň bir bölegi "gara ekran" we onda «UNMOUNTABLE_BOOT_VOLUME» diýen ýalňyşlyk habary bilen ýüzbe-ýüz boldular. Ulgam kompýuteri täzeden başlatmagy (restart) sorasa-da, täzeden açylanda adaty tertipde ýüklenme amala aşmaýar.
Microsoft-yň maglumatyna görä, bu mesele esasan Windows 11-iň 25H2 we 24H2 wersiýalaryna täsir edýär. Şikaýat edýän ulanyjylaryň sany häzirlikçe «çäkli» diýlip hasaplansa-da, näsazlygyň özi «örän çynlakaý» diýlip ykrar edildi.
Kompaniýanyň entek bu mesele üçin taýýar we anyk çözgüdi ýok. Ulanyjylara ulgamy dikeltmegiň adaty gurallaryny (System Recovery) ulanmaga synanyşmak maslahat berilýär.
Geň tarapy, Microsoft-yň öň tanyşdyran we WinRE arkaly awtomatiki dikeltmäge niýetlenen Quick Machine Recovery funksiýasy bu ýagdaýda netije bermeýär.
