Bahreýniň Isa-Taun şäherinde 14 ýaşa çenli türgen gyzlaryň arasynda geçirilen «A» derejeli halkara ýaryşynda türkmen tennisçileri üstünlikli çykyş etdi. Ýaryşlar Aziýa tennis federasiýasynyň (ATF) howandarlygynda geçirildi we dünýäniň 17 ýurdundan türgenleri jemledi.
Jübütlikdäki duşuşyklarda 12 ýaşly Sülgün Işangulyýewa Iordaniýanyň wekili A. Gokaşau bilen bilelikde ikinji orny eýeledi. Ýaryşyň dowamynda olar Russiýadan, Indoneziýadan we Malaýziýadan gelen garşydaşlaryndan üstün çykmagy başardy. Ýarym finalda bolsa Hindistanyň wekillerini utup, finala çykdy. Final duşuşygynda olar Russiýanyň we Eýranyň wekillerinden düzülen S. Himmelreýh/Aýlin Mohammadian jübütinden utulyp, kümüş medala mynasyp boldy.
Ýekelikde geçirilen ýaryşda türkmen türgenleriniň arasynda Aşgabat şäherindäki 87-nji orta mekdebiň 7-nji synp okuwçysy Näzli Hudaýgulyýewa iň gowy netijäni görkezdi. Ol üç duşuşykda ýeňiş gazanyp, ýarym finala çykdy we bu ýerde Hytaýyň wekilinden utuldy. Soňra üçünji ýer ugrundaky oýunda bolsa Ýaponiýanyň wekilinden asgyn gelip, dördünji orny eýeledi.
«ATF Bahrain 14 & Under Category A» ýaryşy reýting utuklaryny berýän ýaryşlara degişlidir. Onuň netijeleri boýunça Näzli Hudaýgulyýewa Aziýanyň ýetginjekler reýtinginde 19-njy, Sülgün Işangulyýewa bolsa 52-nji orny eýeledi. Türgenleriň ikisi-de Türkmenistanyň zenanlar ýygyndysynyň baş tälimçisi Ýuriý Rogusskiniň ýolbaşçylygynda türgenleşýär.
