Türkmenistan Daşkentde geçirilýän Aziýa Olimpiýa Geňeşiniň Baş assambleýasyna gatnaşýar

26-njy ýanwarda Özbegistanyň paýtagtynda 45 döwletden wekiliýetleriň gatnaşmagynda Aziýa Olimpiýa Geňeşiniň (AOG) 46-njy Baş assambleýasy geçirilýär.
Bu halkara sport çäresinde Türkmenistana ýurduň Milli Olimpiýa komitetiniň baş sekretary Ata Akmämmedowyň ýolbaşçylygyndaky resmi wekiliýet wekilçilik edýär. Türkmenistanyň Bedenterbiýe we sport baradaky döwlet komitetiniň başlygy wezipesini Allaberdi Saparow ýerine ýetirýär.
Assambleýanyň gün tertibindäki iň möhüm meseleleriň biri Aziýa Olimpiýa Geňeşiniň täze prezidentini saýlamak boldy. Bu wezipä ýeke-täk dalaşgär hökmünde Kataryň Olimpiýa komitetiniň prezidenti şeýh Joaan bin Hamad Al Tani hödürlendi. Saýlawlar guramanyň häzirki prezidenti, hindistanly Raja Randhir Singhiň saglyk ýagdaýy sebäpli öz wezipesini dowam etdirip bilmezligi sebäpli geçirilýär.
Forumyň dowamynda gatnaşyjylar Aziýada sportuň 2028-nji ýyla çenli ösüş meýilnamalary, sport guramalarynyň işine sanly çözgütleri ornaşdyrmak we Olimpiýa hereketinde ýaşlaryň tutýan orny ýaly meseleleri hem ara alyp maslahatlaşýar.
Assambleýanyň öňüsyrasynda Daşkentde Aziýa Olimpiýa Geňeşiniň Ýerine ýetiriji býurosynyň 106-njy mejlisi geçirildi. Assambleýanyň dowam edýän günleri şäherde dopinge garşy göreş boýunça halkara maslahatlar hem geçirilýär, wekiliýetler bolsa Daşkent şäheriniň ajaýyp sport we medeni desgalaryna aýlanyp görýär.