21-nji ýanwarda Tokio elektrik energiýasy (TEPCO) Kaşiwazaki-Kariwa atom elektrik stansiýasynyň 6-njy blogunyň täzeden işe girizilýändigini yglan etdi. Bu stansiýanyň kuwwatlylygy dünýäde iň ulusydyr, diýip The New York Times gazetinde habar berilýär.
Kompaniýa zawodyň her bir desgasynyň bitewüligini düýpli barlajakdygyna, işe girizmegiň her tapgyrynda jemgyýetçilige maglumat berip durjakdygyna kepil geçdi.
Gazetiň habaryna görä, 6-njy blok 1 milliondan gowrak öýi elektrik bilen üpjün etmek üçin ýeterlik elektrik energiýasyny öndürýär. Atom elektrik stansiýasy esasan Tokionyň şäher sebitine hyzmat edýär.
Reaktoryň kuwwaty 1,36 GW. Fewral aýynyň ahyrynda doly işe girizilenden soň, Tokionyň elektrik üpjünçiliginiň takmynan 2% artmagyna garaşylýar.
Häzirki wagtda stansiýanyň ýedinji reaktorynyň 2030-njy ýyla çenli gaýtadan işe girizilmejekdigi we galan bäş reaktoryň hatardan çykarylmagynyň mümkindigi anyklaşdyrylýar.
Atom elektrik stansiýasy Ýaponiýanyň paýtagtyndan 220 km töweregi demirgazyk-günbatarda ýerleşýär. Stansiýanyň ilkinji energiýa bloky 1985-nji ýylda işe girizildi. 2007-nji ýylyň 16-njy iýulynda bu ýerde 6,8 bal güýjünde ýertitremesi bolup, stansiýanyň desgalaryna zyýan ýetdi we ulanylan ýangyç saklaýjy çelekden radioaktiw suwuň syzmagyna sebäp boldy.
2011-nji ýylda Fukusima – Daiti Atom elektrik stansiýasynda (TEPCO tarapyndan hem dolandyrylan) bolan heläkçilikden soň, Kaşiwazaki-Kariwa-nyň ähli reaktorlary ýapyldy. Onuň gapdaly bilen, ýurtda ýerleşýän 53 sany atom elektrik stansiýalary hem ýapyldy. Şondan bäri Ýaponiýa gazylyp alynýan ýangyç importyny azaltmak we mümkin boldugyndan olardan ýüz öwürmek maksady bilen, öň işläp duran 33 sany atom elektrik stansiýasynyň 14-sini gaýtadan işe girizdi.
