JAMA Pediatrics žurnalynda çap edilen täze gözlegde sosial media ortaça kadada ulanmagyň ýetginjekler üçin has peýdalydygy anyklandy. Bu endigi aşa köp ulanmak ýa-da doly saklanmak olaryň psihologiýa rahatlygynyň peselmegine getirip biler. Gözlegiň awtorlary sosial mediada geçirilýän wagtyň ýetginjekleriň ruhy abadançylygyna gönümel dahylynyň ýokdugyny belleýärler. Bu ýagdaý gönümel dahylsyzlykdan hem beter, has çylşyrymly.
Gözlegiň netijelerine görä, sosial mediany kadaly ulanýan ýetginjekler görkezijileri has göwnejaý. Oňa derek, sosial mediany asla ulanmaýanlaryň ýa-da oňa köp wagt sarp edýänleriň arasynda kynçylykly meseleler tapylýar.
Alymlar barlagda 4-nji synpdan 12-nji synpa çenli yzarlanan 101,000 töweregi awstraliýaly mekdep okuwçylarynyň maglumatlaryny seljerdiler. Çagalar sosial mediada näçe wagt sarp edýändiklerini habar berdiler we özlerini bagtly, kanagatly duýmak, şeýle-de emosional abadançylyklarynyň derejeleri hakda bildiler.
Iň erbet görkezijiler mekdepden soň sosial mediada günde iki sagatdan artyk wagt geçirýän ýetginjekleriň arasynda has köp hasaba alyndy. Şunda 7-9-njy synplarda gyzlaryň saglyk ýagdaýynyň peselmek ähtimallygy üç esse ýokary, oglanlaryňky bolsa iki esse ýokary boldy. Şeýle-de sosial mediany asla ulanmaýan ýokary synp ýetginjeklerde hem töwekgelçilikli ýagdaýlaryň artandygy anyklandy.
«Bu, häzirki sosial media döwründe ösüp gelýän nesil üçin, onuň düýbünden ulanylmazlygynyň töwekgelçilik döredip biljekdigini subut edýän ilkinji gözleg bolup biler.» diýip, Zucker Hillside hassahanasynyň çagalar we ýetginjekler psihiatriýasy boýunça wise-başlygy Wiktor Fornari belleýär. Onuň pikiriçe, ýetginjekleri sosial mediadan saklamagyň jemgyýetden üzňelige eltip biläýmegi-de ähtimal.
