Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan neşir edilýän «Miras» ylmy-köpçülikleýin žurnalynyň nobatdaky sany çapdan çykdy. Giň okyjylar köpçüligine niýetlenen bu neşir türkmen halkynyň ruhy we taryhy mirasyny öwrenmek boýunça alnyp barylýan ylmy-barlag işleriniň netijeleri bilen tanyşdyrmagyny dowam edýär.
Žurnalyň bu sanynyň «Täze ylmy açyşlar» bölüminde Türkmenistanyň Bitaraplyk syýasaty baradaky materiallar hem-de Seljuklylar döwründen şu günümize çenli ýurdumyzyň çäklerinde lukmançylygyň ösüşine bagyşlanan makala ýerleşdirilipdir.
«Medeniýetleriň, halklaryň we siwilizasiýalaryň özara gatnaşyklary» diýen bölümde bolsa türkiýeli hünärmen Soner Saglamyň Döwletmämmet Azadynyň «Wagzy-Azat» eserindäki maşgala gatnaşyklary we nesil terbiyesi baradaky makalasy berilýär.
Şeýle-de, täze sanda Paryzdepe ýadygärliginde geçirilen arheologik gazuw-agtaryş işleri baradaky materiallar we gadymy golýazmalary saklap galmak işine innowasion çözgütleriň ornaşdyrylyşy baradaky neşirler orun aldy.
Žurnalyň nobatdaky sany 2025-nji ýylyň dördünji çärýeginde bolup geçen ylmy we medeni durmuşyň wakalarynyň beýany bilen tamamlanýar.
Žurnal türkmen, rus we iňlis dillerinde neşir edilýär.
