OpenAI amerikan kompaniýasy tarapyndan döredilen ChatGPT çat-boty ýapon uniwersitetlerine giriş synagynda dokuz ders boýunça iň ýokary netijeleri görkezdi. Bu barada emeli aň ulgamlarynyň deňeşdiriji synagyny geçiren LifePrompt kompaniýasynyň hasabatynda aýdylýar.
Barlaga üç EA modeli – ChatGPT, Gemini we Claude Opus gatnaşdy. Synag 15 dersi öz içine aldy.
Barlaglaryň netijesinde ChatGPT dokuz ders boýunça ýokary ballary gazandy, onuň jogaplarynyň ortaça takyklygy bolsa 97% boldy. Iň gowy netijeler matematika, informatika, himiýa, fizika, biologiýanyň esaslary, şeýle-de «syýasat» we «ykdysadyýet» ugurlary boýunça hasaba alyndy.
Anthropic kompaniýasy tarapyndan işlenip düzülen Claude Opus modeli üç ders boýunça iň ýokary netijeleri görkezdi. Google-yň Gemini EA modeli bolsa diňe iki dersde ýokary baha alyp bildi.
ChatGPT-niň iň pes görkezijisi ýapon dili boýunça boldy – 90% dogry jogap. Bilermenler muny edebi tekstleri seljermekdäki, esasanam, gahrymanlaryň emosional ýagdaýlaryny we olaryň hereketlerini düşündirmekdäki kynçylyklar bilen baglanyşdyrýar.
LifePrompt kompaniýasy synag ýumuşlary bilen bagly şular ýaly tejribeleri eýýäm dördünji ýyl geçirýär. 2024-nji ýylda ChatGPT ortaça soraglaryň 66%-ine dogry jogap berdi. Bir ýyldan soň bu görkeziji 91%-e çenli ýokarlandy, bu bolsa modeliň iş hiliniň ep-esli kämilleşendigini görkezýär.
