Täze robot söhbetdeşiniň ýüz keşbiniň nähili boljakdygyny öňünden duýýar we 11 dilde dodak hereketlerini gaýtalaýar.
Kolumbiýa uniwersitetiniň alymlary robotlara adamyň başdan geçirip duran ýagdaýyndaky dodak we ýüz hereketlerini sinhronlaşdyrmaga mümkinçilik berýän tehnologiýany hödürlediler. Gözlegiň netijeleri Science Robotics žurnalynda çap edildi.
Tehnologiýa iki neýron ulgamyna daýanýar. Biri robotyň öz ýüz keşbini dolandyrýar, beýlekisi bolsa söhbetdeşiň ýagdaýyndan ýüz hereketleriniň nähili boljakdygy hakda öňünden maglumat berýär. Adatça häzirki zaman robotlarynyň belli bir gijikme bilen jogap berýän ýagdaýynda, bu çemeleşme adam bilen robotyň özara gatnaşygyny has tebigylaşdyrýar.
Modele öwretmek prosesinde ulanylmadyk bolsa-da, robot fransuz, hytaý we arap dilleri ýaly birnäçe dil bilen işlemäge ukyply. Awtorlar robotyň tehnologiýanyň öň bar bolan bäş usuly bilen deňeşdirilende agyz hereketlerini gaýtalamakda has ýokary takyklygy görkezendigini belleýärler. Olar: «Öndürilen ulgam iňlis dilinden başga 11 dilde dürli fonetik gurluşlar bilen hakyky dodak hereketlerini hem döredip bildi» diýip, aýratyn belleýärler.
Ýüz we boýun hereketleri üçin 26 hereketlendiriji bilen enjamlaşdyrylan Emo robotyny döretmek üçin Eva platformasy ulanyldy. Kameralar ýüz we göz hereketlerini ýazga alýar, çalşyryp bolýan deriniň aşagyndaky magnitler bolsa hereketleriň takyk gözegçiligini üpjün edýär.
Model 45 adamyň gatnaşmagyndaky 970 wideo ýazgy boýunça taýýarlanyldy. Ol ýokary tizlikde işleýär, bu bolsa ýüz hereketlerini bir sekundyň içinde gaýtalamaga mümkinçilik berýär. Synaglar ulgamyň 72,2% ýagdaýda ýüz hereketlerini dogry çaklandygyny görkezdi.
Öndürijiler bu tehnologiýanyň bilim ulgamynda we gartaşan adamlara ideg etmekde peýdasy uly bolar diýip pikir edýärler. Olar, şol bir wagtyň özünde, ony jogapkärli ulanmagyň zerurdygyna hem ünsi çekýärler.
