«Pitt hassahanasy» (Pitt Hospital) serialynyň ikinji möwsümi ABŞ-da uly gyzyklanma bilen garşylandy. Täze möwsümiň ilkinji bölümini 5,4 million tomaşaçy gördi, bu bolsa birinji möwsümiň başlangyç görkezijisinden 200% ýokarydyr. Variety žurnalynyň habar bermegine görä, bir hepdeden soň tomaşaçylaryň sany 7,2 milliona ýetdi.
Taslamanyň üstünliginiň syry: Hünärmenler seriala bolan islegiň çürt-kesik artmagyny onuň abraýly baýraklara mynasyp bolmagy bilen baglanyşdyrýarlar. Häzirki wagta çenli taslama 2 gezek «Altyn globus» (Golden Globe) we 4 gezek «Emmi» (Emmy) baýraklaryna mynasyp boldy.
Serial Pittsburg şäherindäki gaýragoýulmasyz lukmançylyk kömegi (ER) bölüminde işleýän hünärmenleriň durmuşyndan söhbet açýar. Taslamanyň özboluşlylygy — her bir bölüm lukmanlaryň iş gününiň takyk bir sagadyny hakyky wagt tertibinde (real-time) suratlandyrýar.
Täze möwsümde nämelere garaşylýar? Ikinji möwsümiň wakalary ABŞ-nyň Garaşsyzlyk gününde (4-nji iýulda) bolup geçýär. Bellesek, berlen statistika diňe ABŞ-nyň çäklerine degişli bolup, HBO Max platformasynyň elýeterli bolan beýleki ýurtlaryndaky tomaşaçy sanyny öz içine almaýar.
