Paleoantropologlar Homo habilis-iň (başarnykly adam) iň doly skeleti barada gürrüň berdi. Homo urugynyň iň irki wekilleriniň biri bolan bu görnüş 2 million ýyldan gowrak ozal ýaşapdyr. Ol awstralopitekler bilen adamlaryň has giçki ata-babalarynyň – Homo erectus-yň (göni ýöreýän adam) anatomiki aýratynlyklaryny özünde birleşdiripdir. Ylmy gözleg The Anatomical Record žurnalynda neşir edildi, tapyndy barada giňişleýin maglumatlar Live Science neşiri tarapyndan berilýär.
2012-nji ýylda alymlar Keniýanyň demirgazygynda Homo habilis-iň häzire çenli iň doly skeletini tapdy. Tapyndylar dişlerden, ýaýjyk süňkünden, pilçe, oňurga, gapyrga böleklerinden, bilek we egin süňklerinden, şeýle-de çanaklyk we injik süňklerinden ybarat. Tapyndylaryň ýaşy 2,02 million ýyldan 2,06 million ýyla çenli diýlip hasaplanýar.
Bilermenleriň gelen netijeleri boýunça, bu uly wekiliň boýy, takmynan, 160 sm bolup, agramy 30 kg töweregi bolupdyr. Alymlar Homo habilis-iň ýogyn süňkleri bilen uzyn we güýçli bileginiň bolandygyny, munuň bolsa ony awstralopitekler bilen ýakynlaşdyryp, onuň agaçlarda hereket etmek ukybynyň bolup bilendigini görkezýär. Şol bir wagtyň özünde, skeletiň analizi bu görnüşiň ýöreýşiniň Homo erectus-a ýakyn bolandygyny çaklamaga mümkinçilik berýär.
Tapyndy Gündogar Afrikada gomininleriň ewolýusiýasyny öwrenmekde uly ähmiýete eýedir. Çünki azyndan dört görnüş (Paranthropus boisei, Homo rudolfensis, Homo habilis we Homo erectus) şol bir ýerde şol bir wagtda ýaşapdyr. Şundan ugur alsaň, Homo habilis-iň Homo erectus-yň gönüden-göni ata-babalary bolandygy jedelli mesele bolup galýar.
