2026-njy ýylyň 10-14-nji ýanwary aralygynda Astanada geçirilen matematika, fizika we kompýuter ylymlary boýunça 22-nji Halkara Žautykow olimpiadasynda türkmen mekdep okuwçylary ajaýyp netijeleri görkezdiler. Gazagystanyň Bilim ministrliginiň Daryn merkezi tarapyndan guralan abraýly intellektual marafona 16 ýurtdan 600-den gowrak zehinli ýaşlar gatnaşdy. Halkara olimpiadada 28 okuwçydan ybarat türkmen topary hem üstünlikli çykyş edip, bir altyn, dört kümüş we 11 bürünç – jemi 16 medal gazandy.
Matematika ýaryşynda görnükli netije bilen altyn medal gazanmak Aşgabadyň 86-njy mekdebiniň 10-njy synp okuwçysy Hemra Gurbanowyň paýyna düşdi. Bu ugurda kümüş medallary Mälikşa Meýlismyradow (86-njy mekdep), Myrat Ruslanow (97-nji mekdep) we Selim Hommatdurdyýew (135-nji mekdep) kümüş medalyň, Seýitgeldi Hojamuhammedow, Sanjar Hojanyýazow, Söýunmuhammet Geldimmämmedow, Begli Işanmyradow, Kümüş Nobatowa we Begenç Gummanow bolsa bürünç medalyň eýeleri boldular.
Beýleki ugurlar boýunça hem taýýarlyk derejeleriniň ýokarydygyny fizika ýaryşynda Mary welaýatynyň Şatlyk şäherçesinden Döwlet Annamyradow kümüş medal, Nurgeldi Annagurdow we Aýsenem Kakamyradowa bürünç medal gazanmak bilen subut etdiler. Kompýuter ylymlary ugrundan bürünç medal Hojamuhammet Hydyrowa, Yhlas Annamyradowa we Kasym Köçekowa mynasyp görüldi.
Bu üstünlik 2026-njy ýylda türkmen ýaşlarynyň ilkinji uly halkara ýeňşi boldy. Okuwçylarymyzyň dünýä derejesinde gazanýan şeýle üstünlikleri ýurdumyzyň milli bilim ulgamynyň barha öňe ilerleýändigini tassyklaýar.
